2Sa 5 | NdeIBE | STEP | Zonke izizwana zako-Israyeli zaya kuDavida eHebhroni zathi, “Thina siyinyama yakho legazi lakho.

2 Samuel 5

UDavida uba yinkosi yako-Israyeli

1 Zonke izizwana zako-Israyeli zaya kuDavida eHebhroni zathi, “Thina siyinyama yakho legazi lakho. 2 Esikhathini esedlulayo, uSawuli eseseyinkosi yethu, wena nguwe owawukhokhela u-Israyeli emkhankasweni wakhe wezimpi. LoJehova wathi kuwe, ‘Uzakwelusa abantu bami u-Israyeli, njalo uzakuba ngumbusi wabo.’ ”

3 Kwathi abadala bonke bako-Israyeli sebefikile enkosini uDavida eHebhroni inkosi yenza isivumelwano labo eHebhroni phambi kukaJehova, basebegcoba uDavida ukuba abe yinkosi ko-Israyeli.

4 UDavida waba yinkosi eleminyaka engamatshumi amathathu, wabusa iminyaka engamatshumi amane. 5 EHebhroni wabusa uJuda iminyaka eyisikhombisa lezinyanga eziyisithupha, kwathi eJerusalema wabusa u-Israyeli wonke loJuda iminyaka engamatshumi amathathu lantathu.

UDavida unqoba iJerusalema

6 Inkosi labantu bayo baya eJerusalema ukuyahlasela amaJebusi ayehlala khona. AmaJebusi athi kuDavida, “Kawuyikungena lapha; leziphofu labaqhulayo bangakuvimba.” Acabanga athi, “UDavida angeke angene lapha.”

7 Kodwa uDavida wayithumba inqaba yaseZiyoni, iDolobho likaDavida.

8 Ngalolosuku uDavida wathi, “Lowo onqoba amaJebusi kuzamele asebenzise umgelo wamanzi ukuba afinyelele ‘abaqhulayo leziphofu’ labo abayizitha zikaDavida.” Yikho nje besithi, “Iziphofu labaqhulayo” kabayikungena esigodlweni.”

9 UDavida wahlala enqabeni waseyibiza ngokuthi iDolobho likaDavida. UDavida wakha enhlangothini zonke zayo kusukela emadundulwini ayelapho kusiya phakathi.

10 Waqhubeka esiba lamandla ngoba uJehova uNkulunkulu uSomandla wayelaye.

11 Ngalesosikhathi uHiramu inkosi yaseThire wathuma izithunywa kuDavida zilezigodo zemisedari lababazi bamapulanka kanye lababazi bamatshe, bakhela uDavida isigodlo.

12 UDavida wakwazi ukuthi uJehova wayembekile ukuba abe yinkosi yako-Israyeli wawuphakamisa lombuso wakhe ngenxa yabantu bakhe u-Israyeli.

13 Esesukile eHebhroni uDavida wathatha abanye abafazi beceleni kanye labafazi eJerusalema, kwazalwa amanye amadodana lamadodakazi futhi. 14 Nanka amabizo abantwana abazalelwa khona: uShamuwa, loShababi, loNathani, loSolomoni, 15 lo-Ibhari, lo-Elishuwa, loNefegi, loJafiya, 16 lo-Elishama, lo-Eliyada kanye lo-Elifelethi.

UDavida unqoba amaFilisti

17 Kwathi amaFilisti esezwe ukuthi uDavida wayegcotshwe ukuba yinkosi yako-Israyeli wonke aphuma ukuyamdinga, kodwa uDavida wakuzwa lokho wasesehlela enqabeni.

18 AmaFilisti ayesefikile njalo esekhankase eSigodini saseRafayimi, 19 ngakho uDavida wabuza uJehova wathi, “Ngingayawahlasela amaFilisti na? Uzawanikela kimi na?” UJehova wamphendula wathi, “Hamba, ngoba impela amaFilisti ngizawanikela kuwe.”

20 Ngakho uDavida waya eBhali Pherazimi, lapho awehlula khona. Wathi, “UJehova ufohlele ezitheni zami phambi kwami njengamanzi efohla.” Ngakho indawo leyo yathiwa yiBhali Pherazimi. 21 AmaFilisti atshiya izithombe zawo khonapho, uDavida labantu bakhe bazithatha bahamba lazo.

22 AmaFilisti abuye afika futhi akhankasa eSigodini saseRafayimi; 23 ngakho uDavida wabuza uJehova, yena waphendula wathi, “Ungayi uqondile, kodwa bhoda ngemuva kwawo uwahlasele maqondana lezihlahla zebhalisamu. 24 Akuthi khonokho nje usizwa umsindo wokuhamba phezu kwezihlahla zebhasilamu, uqhubeke ngokuphangisa, ngoba lokho kuzakutsho ukuthi uJehova usehambe phambi kwakho ukuyahlasela ibutho lamaFilisti.” 25 Ngakho uDavida wenza njengokulaywa kwakhe nguJehova, njalo amaFilisti wawacakazela phansi ummango wonke kusukela eGibheyoni kusiya eGezeri.